ಮಕ್ಕಳ ಪ್ರೀತಿ-ಪ್ರೇಮದ ಬಗ್ಗೆ ಗೊತ್ತಾದಾಗ ಬಹಳಷ್ಟು ಪಾಲಕರು ಅವರ ಮೇಲೆ ಕೋಪ ಮಾಡಿಕೊಳ್ಳುತ್ತಾರೆ. ಹಾಗೂ ಮೊಬೈಲ್ ಫೋನ್ ಕಸಿದುಕೊಳ್ಳುತ್ತಾರೆ. ಕಠೋರವಾದ ಶಿಕ್ಷೆಯನ್ನೂ ನೀಡಬಹುದು. ಪರಿಣಾಮವಾಗಿ, ಮಕ್ಕಳು ಹೆದರಿಹೋಗಬಹುದು ಅಥವಾ ಪಾಲಕರನ್ನು ದ್ವೇಷಿಸಲು ತೊಡಗಬಹುದು.
ಮಕ್ಕಳು ನಿಮ್ಮೊಂದಿಗೆ ಮನಬಿಚ್ಚಿ ಮಾತನಾಡಬೇಕು ಎಂದಾದರೆ ಅವರೊಂದಿಗೆ ಸ್ನೇಹಿತರಂತೆ ಇರಬೇಕು. ಮಕ್ಕಳೊಂದಿಗೆ ಪಾಲಕರಾಗಿ ಮಾತನಾಡಿದರೆ ಅವರು ನಿಮ್ಮಿಂದ ಬಹಳಷ್ಟು ವಿಚಾರಗಳನ್ನು ಮುಚ್ಚಿಡುತ್ತಾರೆ. “ನಾಚಿಕೆ ಆಗಲ್ವಾ? ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಪ್ರೀತಿ-ಪ್ರೇಮ ಎನ್ನುತ್ತೀಯಲ್ಲ? ಕುಟುಂಬದ ಮರ್ಯಾದೆ ತೆಗೆಯುತ್ತೀಯʼ ಎಂದೆಲ್ಲ ಮಾತನಾಡಬೇಡಿ. ಈ ಮಾತುಗಳು ಮಕ್ಕಳಲ್ಲಿ ಕೋಪ ಬರಿಸುತ್ತವೆ. ಮೊಬೈಲ್ ಗೆ ನಿಷೇಧ ಹೇರುವುದು, ಶಿಕ್ಷೆ ನೀಡುವುದನ್ನು ಮಾಡಿದರೆ ಮಕ್ಕಳು ಇನ್ನಷ್ಟು ದೂರವಾಗುವ ಸಾಧ್ಯತೆಯೇ ಅಧಿಕ. ಹೀಗಾಗಿ, ಪಾಲಕರು ಈ ಸಮಯದಲ್ಲಿ ಎಚ್ಚರಿಕೆಯಿಂದ ವರ್ತಿಸಬೇಕಾಗುತ್ತದೆ.
. ಹದಿಹರೆಯದ ಸಮಯದಲ್ಲಿ ಮಕ್ಕಳಿಗೆ ಪಾಲಕರ ಬೆಂಬಲ ಅಗತ್ಯ. ಕಿಶೋರಾವಸ್ಥೆಯಲ್ಲಿ ಆಗುವ ಹಾರ್ಮೋನ್ ಬದಲಾವಣೆಗಳಿಂದ ಭಿನ್ನ ಲಿಂಗಿಗಳ ಕುರಿತಾದ ಆಕರ್ಷಣೆ ಸಹಜ. ಹೀಗಾಗಿ, ಮಕ್ಕಳ ಮೇಲೆ ಕೋಪ ಮೂಡಿಸಿಕೊಳ್ಳುವುದು ಸರಿಯಲ್ಲ.
• ವಿಷಯ ತಿಳಿದಾಕ್ಷಣ ಕೋಪಿಸಿಕೊಳ್ಳುವ ಬದಲು ಯಾರೊಂದಿಗಾದರೂ ಮಾತನಾಡಿ. ಪತಿ-ಪತ್ನಿಯ ಜತೆ ಕೂತು ಚರ್ಚಿಸಿ. ಮೊದಲಿಗೆ, ನಿಮ್ಮನ್ನು ನೀವು ಶಾಂತಗೊಳಿಸಿಕೊಳ್ಳುವುದು ಅಗತ್ಯ.
•ಮಕ್ಕಳ ಭಾವನೆಗಳಿಗೆ ಬೆಲೆ ನೀಡಿ. ಅವರ ಪ್ರೀತಿಯನ್ನು ಒಪ್ಪಿಕೊಳ್ಳಿ. ಮಕ್ಕಳಲ್ಲಿ ಆಗುತ್ತಿರುವ ಬದಲಾವಣೆ ಅಥವಾ ಭಾವನೆಗಳಿಗೆ ಬೆಲೆ ನೀಡಿ. ಅವರು ಹೇಳಿದ್ದಕ್ಕೆಲ್ಲ “ಹೂಂʼಗುಡಬೇಕು ಎಂದಲ್ಲ, ಆದರೆ, ಅವರ ಭಾವನೆಗಳನ್ನು ಗೌರವಿಸುವುದು ಉತ್ತಮ. ಕಿಶೋರಾವಸ್ಥೆಯ ಈ ಸಮಯದಲ್ಲಿ ಅವರಲ್ಲಿ ಕೋಪ ಹೆಚ್ಚಾಗಿ ಇರುತ್ತದೆ. ಇದನ್ನು ಅರ್ಥೈಸಿಕೊಳ್ಳಬೇಕು.
• ಅವರ ಪ್ರೀತಿಯ ಬಗ್ಗೆ ಮುಕ್ತವಾಗಿ ಮಾತನಾಡಬೇಕು. ಪ್ರೀತಿಸುವುದು ತಪ್ಪಲ್ಲ ಎನ್ನುವ ಭಾವನೆಯಲ್ಲೇ ಮಾತನಾಡಿದರೆ ಅವರಿಗೆ ಪಾಲಕರ ಬಗ್ಗೆ ನಂಬಿಕೆ ಮೂಡುತ್ತದೆ. ಅವರೊಂದಿಗೆ ಮಾತನಾಡಿದರೆ ಅನೇಕ ಗೊಂದಲ, ಸಮಸ್ಯೆಗಳು ನಿವಾರಣೆಯಾಗುತ್ತವೆ.
•ಮಗಳಾಗಿರಲಿ, ಮಗನಾಗಿರಲಿ ಎಲ್ಲ ಕ್ಲಾಸ್ ಮೇಟ್ಗಳೊಂದಿಗೆ ಸ್ನೇಹದಿಂದ ಇರಲು ತಿಳಿಸಿ. ಶಾಲೆ ಬಿಟ್ಟ ಬಳಿಕ ಯಾರದ್ದೋ ಒಬ್ಬರ ಜತೆ ಮಾತನಾಡುವ ಬದಲು ಎಲ್ಲರೊಂದಿಗೂ ಸ್ನೇಹದಿಂದ ಇರುವಂತೆ ಪ್ರೇರೇಪಿಸಬೇಕು. ಜೊತೆಗೆ ಈ ವಯಸ್ಸಿನಲ್ಲಿ ಪರಸ್ಪರ ರೊಮ್ಯಾಂಟಿಕ್ ಭಾವನೆ, ಲೈಂಗಿಕ ಭಾವನೆಗಳೆಲ್ಲ ಸಹಜ ಎನ್ನುವುದನ್ನು ತಿಳಿಸಿ ಹೇಳಿ. ಒಂದೊಮ್ಮೆ ನಿಮಗೆ ಈ ವಿಚಾರಗಳನ್ನು ಹೇಳುವುದು ಕಷ್ಟವಾದರೆ ಅವರನ್ನು ಕೌನ್ಸೆಲರ್ ಬಳಿ ಕರೆದೊಯ್ಯಬಹುದು.
• ಮಕ್ಕಳೊಂದಿಗೆ ಅವರ ಸ್ನೇಹಿತರನ್ನೂ ಅರಿತುಕೊಳ್ಳಬೇಕು. ಆಪ್ತ ಸ್ನೇಹಿತರನ್ನು ಮನೆಗೆ ಆಹ್ವಾನಿಸುವಂತೆ ತಿಳಿಸಬೇಕು. ಅವರ ಗುಂಪು ಯಾವುದರ ಬಗ್ಗೆ ಆಸಕ್ತಿ ಹೊಂದಿದೆ, ಅವರ ಹವ್ಯಾಸವೇನು ಎನ್ನುವುದನ್ನು ತಿಳಿದುಕೊಳ್ಳಬೇಕು. ಅವರೊಂದಿಗೆ ನೀವೂ ಸ್ನೇಹಿತರಾಗಿ ಇದ್ದುಬಿಡಬೇಕು.