ಜಗತ್ತಿನಲ್ಲಿ ಸರಿ ಸುಮಾರು 50 ಪ್ರತಿಶತಕ್ಕೂ ಅಧಿಕ ತಾಯಂದಿರು ಮಗುವಿಗೆ ಹಾಲುಣಿಸುವುದು ಹೆರಿಗೆ ನೋವಿಗಿಂತಲೂ ಕಷ್ಟಕರ ಕೆಲಸ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಆದರೆ ಸ್ತನಪಾನ ಯಾಕೆ ಕಷ್ಟಕರ ಎನಿಸುತ್ತದೆ..? ಈ ಮಹಿಳೆಯರು ಗರ್ಭಿಣಿಯಾದ ಸಂದರ್ಭದಲ್ಲಿ ಯಾವ ವಿಚಾರವನ್ನು ನಿರ್ಲಕ್ಷಿಸಿದ ಪರಿಣಾಮ ಅವರಿಗೆ ಈ ರೀತಿ ತೊಂದರೆ ಉಂಟಾಗುತ್ತದೆ..? ಸ್ತನಪಾನ ಸುಲಭವಾಗಿಸಲು ನಾವೇನು ಮಾಡಬೇಕು ಎಂಬುದಕ್ಕೆ ಮಾಹಿತಿ ತಿಳಿದುಕೊಳ್ಳೋಣ:
ನೋವು ರಹಿತ ಸ್ತನಪಾನಕ್ಕಾಗಿ ನೀವು ಆಯ್ಕೆ ಮಾಡಿಕೊಳ್ಳಬಹುದಾದ ಒಂದೇ ಒಂದು ಮಾರ್ಗವೆಂದರೆ ಸ್ತನಗಳ ಮಸಾಜ್. ಇದನ್ನು ನೀವು ಗರ್ಭಿಣಿಯಾದ ದಿನಗಳಿಂದಲೇ ಆರಂಭಿಸಬೇಕು. ಇವುಗಳು ಸ್ತನಗಳಲ್ಲಿ ಮುಚ್ಚಿರುವ ನಾಳಗಳು ಕಾರ್ಯನಿರ್ವಹಿಸಲು ಸಹಾಯ ಮಾಡುತ್ತದೆ. ಸ್ತನದ ತೊಟ್ಟುಗಳಿಗೆ ಕೊಬ್ಬರಿ ಎಣ್ಣೆಯನ್ನು ಹಚ್ಚಿ ಮಸಾಜ್ ಮಾಡಿಕೊಳ್ಳುವುದರಿಂದ ನಿಮಗೆ ಭವಿಷ್ಯದಲ್ಲಿ ಸ್ತನಪಾನದ ನೋವು ಅಷ್ಟೊಂದು ಕಾಡುವುದಿಲ್ಲ. ಮಾರುಕಟ್ಟೆಯಲ್ಲಿ ಸಿಗುವ ಯಾವುದೇ ರಾಸಾಯನಿಕ ಕ್ರೀಮ್ಗಳು ಅಥವಾ ಮಷಿನ್ಗಳನ್ನು ಖರೀದಿಸುವ ಅಗತ್ಯವಿಲ್ಲ. ಮನೆಯಲ್ಲಿಯೇ ಇರುವ ಆರ್ಯುವೇದಿಕ ಪದಾರ್ಥಗಳನ್ನು ಬಳಕೆ ಮಾಡಿ ನೀವು ಸ್ತನ ಮಸಾಜ್ ಮಾಡಿಕೊಳ್ಳಬಹುದಾಗಿದೆ.
ನವಜಾತ ಶಿಶುಗಳು ಅತ್ಯಂತ ಸೂಕ್ಷ್ಮವಾಗಿರುತ್ತವೆ. ಹೀಗಾಗಿ ನೀವು ಸ್ವಚ್ಛವಲ್ಲದ ಕೈಗಳಿಂದ ನಿಮ್ಮ ಸ್ತನ ಮಸಾಜ್ ಮಾಡಿ ಬಳಿಕ ಅದೇ ಸ್ತನದಿಂದ ನಿಮ್ಮ ಮಗು ಹಾಲು ಕುಡಿದರೆ ಮಗುವಿನ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಉಂಟಾಗಬಹುದು. ಹೀಗಾಗಿ ಚೆನ್ನಾಗಿ ಕೈ ತೊಳೆದು ಬಳಿಕವೇ ಸ್ತನ ಮಸಾಜ್ ಮಾಡಿಕೊಳ್ಳಿ.
ಸ್ತನ ಮಸಾಜ್ಗೆಂದೇ ಮಾರುಕಟ್ಟೆಯಲ್ಲಿ ಸಾಕಷ್ಟು ಕ್ರೀಂಗಳು, ತೈಲಗಳು ಲಭ್ಯವಿದೆ. ಆದರೆ ಇವುಗಳಲ್ಲಿ ರಾಸಾಯನಿಕಗಳ ಬಳಕೆ ಇರುವುದರಿಂದ ಇದು ಕೂಡ ಮಗುವಿನ ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದಲ್ಲ. ಹೀಗಾಗಿ ಮನೆಯಲ್ಲೇ ತಯಾರಿಸಿದ ಕೊಬ್ಬರಿ ಎಣ್ಣೆ ಸ್ತನ ಮಸಾಜ್ಗೆ ಸೂಕ್ತ ಎಂದು ಹೇಳಬಹುದು.
ಮಗುವಿಗೆ ಹಾಲುಣಿಸುವ ಮುನ್ನ ಅತ್ಯಂತ ನಯವಾಗಿ, ಸ್ವಲ್ಪವೂ ಒತ್ತಡ ಹಾಕಿಕೊಳ್ಳದೇ ನಿಮ್ಮ ಸ್ತನಗಳ ಮೇಲೆ ವರ್ತುಲಾಕಾರದಲ್ಲಿ ಕೈಯಾಡಿಸುವ ಮೂಲಕ ಸ್ತನ ಮಸಾಜ್ ಮಾಡಿಕೊಳ್ಳಿ. ನಿಮ್ಮ ಭುಜಗಳಿಗೆ ಮಸಾಜ್ ಮಾಡಿಕೊಳ್ಳುವ ರೀತಿಯಲ್ಲಿ ಬಲವಾಗಿ ಒತ್ತಿಕೊಳ್ಳುವುದು ಬೇಡ.
ಐಸ್ ಪ್ಯಾಕ್ಗಳನ್ನು ಬಳಸಿ:
ಕೆಲವರಿಗೆ ಸ್ತನಗಳಲ್ಲಿ ಅತೀವ ನೋವಿರುತ್ತದೆ. ಸ್ಪರ್ಶಿಸಲೂ ಆಗದಂತಹ ಪರಿಸ್ಥಿತಿ ಇರುತ್ತದೆ. ಇಂಥಾ ಸಂದರ್ಭಗಳಲ್ಲಿ ನೀವು ಮೊದಲು ಐಸ್ಪ್ಯಾಕ್ನ್ನು ನಿಮ್ಮ ಸ್ತನದ ಮೇಲಿಟ್ಟುಕೊಂಡು ಬಳಿಕ ಸ್ತನ ಮಸಾಜ್ ಮಾಡಿಕೊಳ್ಳುವುದರಿಂದ ನಿಮಗೆ ಸ್ವಲ್ಪ ಆರಾಮದಾಯಕ ಎನಿಸುತ್ತದೆ.