ಮಳೆಗಾಲದಲ್ಲಿ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಹಣ್ಣುಗಳನ್ನು ತಿನ್ನುವುದು ಬಹಳ ಮುಖ್ಯ. ದಿನಕ್ಕೆ ಒಂದು ಹಣ್ಣು ತಿನ್ನುವುದರಿಂದ ದೇಹಕ್ಕೆ ಅಗತ್ಯವಾದ ಜೀವಸತ್ವಗಳು ಮತ್ತು ಖನಿಜಗಳು ದೊರೆಯುತ್ತವೆ. ಆದರೆ ಮಳೆಗಾಲದಲ್ಲಿ ಗಾಳಿಯ ಹೆಚ್ಚಿನ ಆರ್ದ್ರತೆ ಇರುವುದರಿಂದ ಹಣ್ಣುಗಳು ಬೇಗನೆ ಹಾಳಾಗುತ್ತವೆ. ಹಾಗಾದ್ರೆ ಈ ಸಮಸ್ಯೆಯನ್ನು ತಡೆಗಟ್ಟಲು ಹಣ್ಣುಗಳನ್ನು ಹೆಚ್ಚು ಕಾಲ ತಾಜಾವಾಗಿಡುವುದು ಹೇಗೆ ಎಂಬುದಕ್ಕೆ ಕೆಲವು ಟಿಪ್ಸ್ ಈ ಕೆಳಗಿನಂತಿದೆ ನೋಡಿ.
ಹಣ್ಣುಗಳನ್ನು ಸ್ವಚ್ಛಗೊಳಿಸುವ ವಿಧಾನ:
ಮಾರುಕಟ್ಟೆಯಿಂದ ತಂದ ಹಣ್ಣುಗಳನ್ನು ತಕ್ಷಣ ರೆಫ್ರಿಜರೇಟರ್ನಲ್ಲಿ ಇಡಬೇಡಿ. ಈ ಹಣ್ಣುಗಳ ಮೇಲೆ ಧೂಳು, ಸೂಕ್ಷ್ಮಜೀವಿಗಳು ಮತ್ತು ಮಾಲಿನ್ಯ ಇರಬಹುದು. ಹಾಗಾಗಿ ಮೊದಲು ಅವುಗಳನ್ನು ತಣ್ಣೀರಿನಿಂದ ಚೆನ್ನಾಗಿ ತೊಳೆಯಿರಿ.
ಹಣ್ಣುಗಳ ಮೇಲೆ ಹೆಚ್ಚು ಧೂಳು ಇದ್ದರೆ, ಅವುಗಳನ್ನು ಸೌಮ್ಯವಾದ ಲಿಕ್ವೆಡ್ ಸೋಪಿನಿಂದ ತೊಳೆಯಬಹುದು. ಹಣ್ಣುಗಳನ್ನು ತೊಳೆದ ನಂತರ ಸ್ವಚ್ಛವಾದ, ಒಣಗಿದ ಬಟ್ಟೆಯಿಂದ ಚೆನ್ನಾಗಿ ಒಣಗಿಸಿ. ಹಣ್ಣುಗಳ ಮೇಲೆ ನೀರಿದ್ದರೆ, ಅವು ಬೇಗನೆ ಕೊಳೆತು ಹೋಗುತ್ತವೆ, ಇದು ಅವುಗಳ ಶೆಲ್ಫ್ ಜೀವಿತಾವಧಿಯನ್ನು ಕಡಿಮೆ ಮಾಡುತ್ತದೆ.
ರೆಫ್ರಿಜರೇಟರ್ನಲ್ಲಿ ಹಣ್ಣುಗಳನ್ನು ಸಂಗ್ರಹಿಸಲು ಸರಿಯಾದ ತಾಪಮಾನವು ಬಹಳ ಮುಖ್ಯ. ಸಾಕಷ್ಟು ಹಣ್ಣುಗಳು ಸಾಮಾನ್ಯವಾಗಿ 1-4 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ 5-7 ದಿನಗಳವರೆಗೆ ತಾಜಾವಾಗಿರುತ್ತವೆ. ಈ ತಾಪಮಾನವನ್ನು ನಿಮ್ಮ ರೆಫ್ರಿಜರೇಟರ್ನಲ್ಲಿ ಹೊಂದಿಸಿ.
ರೆಫ್ರಿಜರೇಟರ್ನ ಕೆಳಭಾಗದಲ್ಲಿರುವ ಕ್ರಿಸ್ಪರ್ ಡ್ರಾಯರ್ನಲ್ಲಿ ಹಣ್ಣುಗಳನ್ನು ಸಂಗ್ರಹಿಸುವುದು ಉತ್ತಮ. ಈ ಡ್ರಾಯರ್ ಹಣ್ಣುಗಳನ್ನು ಸಂಗ್ರಹಿಸಲು ಸೂಕ್ತ ಸ್ಥಳವಾಗಿದೆ, ಅಲ್ಲಿ ಶೀತ ಮತ್ತು ತೇವಾಂಶವು ಸಮತೋಲನದಲ್ಲಿರುತ್ತದೆ. ಇದರಿಂದ ಹಣ್ಣುಗಳು ಒಣಗುವುದಿಲ್ಲ ಮತ್ತು ಬೇಗನೆ ಕೊಳೆಯು ಹೋಗುವುದಿಲ್ಲ.
ಹಣ್ಣುಗಳನ್ನು ಸಂಗ್ರಹಿಸುವಾಗ ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆಗಳು:
ಹಣ್ಣುಗಳನ್ನು ಪ್ಲಾಸ್ಟಿಕ್ ಕವರ್ ಅಥವಾ ವೃತ್ತಪತ್ರಿಕೆಯಲ್ಲಿ ಸುತ್ತಿ ಇಡುವುದರಿಂದ ಅವು ಗಾಳಿಗೆ ಒಡ್ಡಿಕೊಳ್ಳುವುದನ್ನು ಕಡಿಮೆ ಮಾಡುತ್ತದೆ. ಇದು ಬಾಳೆಹಣ್ಣು, ಮಾವು ಮತ್ತು ಪೇರಳೆ ಮುಂತಾದ ಹಣ್ಣುಗಳಿಗೆ ವಿಶೇಷವಾಗಿ ಉಪಯುಕ್ತವಾಗಿದೆ. ಈ ರೀತಿ ಸುತ್ತುವುದರಿಂದ ಮಳೆಗಾಲದಲ್ಲಿ ಅವು ಹೆಚ್ಚು ಕಾಲ ತಾಜಾವಾಗಿರಲು ಸಹಾಯ ಮಾಡುತ್ತದೆ.
ಅತಿಯಾಗಿ ಮಾಗಿದ ಹಣ್ಣುಗಳನ್ನು ತೆಗೆಯುವುದು:
ಒಂದು ಹಣ್ಣು ಅತಿಯಾಗಿ ಮಾಗಿದ್ದರೆ, ಅದು ಎಥಿಲೀನ್ ಅನಿಲವನ್ನು ಬಿಡುಗಡೆ ಮಾಡುತ್ತದೆ. ಈ ಅನಿಲವು ಇತರ ಹಣ್ಣುಗಳು ಹಣ್ಣಾಗಲು ಮತ್ತು ಬೇಗನೆ ಹಾಳಾಗಲು ಕಾರಣವಾಗುತ್ತದೆ. ಆದ್ದರಿಂದ, ಪ್ರತಿದಿನ ಹಣ್ಣುಗಳನ್ನು ಪರಿಶೀಲಿಸಿ ಮತ್ತು ಅತಿಯಾಗಿ ಮಾಗಿದ ಅಥವಾ ಹಾನಿಗೊಳಗಾದ ಯಾವುದನ್ನಾದರೂ ತಕ್ಷಣ ತೆಗೆದುಹಾಕಿ.
ಈ ಸರಳ ಸಲಹೆಗಳನ್ನು ಅನುಸರಿಸುವ ಮೂಲಕ ಮಳೆಗಾಲದಲ್ಲಿಯೂ ಸಹ ನೀವು ಹಣ್ಣುಗಳನ್ನು ತಾಜಾ ಮತ್ತು ಆರೋಗ್ಯಕರವಾಗಿರಿಸಿಕೊಳ್ಳಬಹುದು. ಇದು ಪ್ರತಿದಿನ ಮಾರುಕಟ್ಟೆಗೆ ಹೋಗುವ ಅನಗತ್ಯ ವೆಚ್ಚವನ್ನು ಸಹ ಕಡಿಮೆ ಮಾಡುತ್ತದೆ.
